Ақмола облысында мұз қалашығы әлі алынбаған

Ақмола облысының Щучинск қаласында жаңа жыл мерекесі қарсаңында орнатылған мұз қалашығы көктем келсе де алынбаған. Жергілікті биліктің мәліметінше, мердігер мекеме жұмысты құжатта белгіленген жоспар бойынша орындамаған. Яғни, кейбір мұз мүсіндері мүлдем қойылмаса, қалғандары сапасыз жасалған.

Сондықтан әкімдік істелінген жұмысқа ақша төлеуден бас тартып, оларды сотқа берген. Қазіргі таңда тендерді ұтып алған компания өз ісіне салғырттық танытқан деп танылған.

Айта кетейік, өткен жылы бұл жұмыстарға 11 миллион теңгеге жуық қаржы бөлінген еді.

Алтынбек Омаров, Щучинск қаласы әкімі аппараты ұйымдастыру жұмысы бөлімінің бас маманы:

Біз 29 желтоқсан күні оларды сотқа бердік. Өйткені олар келісімшартта белгіленген талаптарды дұрыс орындамаған.Кейін мұз қалашығын алып тастаңыздар деп хат та жаздық. Алайда, олар сот құрылыс сараптамасы болуы мүмкін деп бас тартты.

Ұмсындық Наурызбаева