Алматы облысында сот орындаушы алиментке төленген 800 мың теңгені жымқырған

Алматы облысында жеке сот орындаушысы бір жарым жыл бойы өзгенің алиментін жымқырып келген. Облыстық прокуратураның хабарлауынша, бала күтіміне арналған қаражат ай сайын борышкердің жалақысынан сот орындаушысының арнайы шотына түсіп отырған.

Дегенмен ақша әрі қарай баланың анасының шотына аударылмаған. Қолды болған қаражат 800 мың теңгеден асып жығылады. Сот орындаушы мұнымен қоймай, борышкердің жүргізуші куәлігінің қолданылуын тоқтатуға дейін шара қабылдаған. Салдарынан борышкер жұмысынан айырылған. Қазір сот орындаушысының заңсыз іс-әрекетіне қатысты қылмыстық іс қозғалды.

Нұрсұлтан Тілектес