Ұлыбритания экономикасы техникалық рецессияға ұшырады

Ұлыбритания экономикасы техникалық рецессияға ұшырады. Бұл үдеріс экономика екі тоқсан қатарынан құлдырағанда жарияланады. Жалпы ішкі өнім былтыр жыл соңында 0,3%-ға қысқарған.

Бұл көрсеткіш сарапшылардың жорамалынан да нашар болды. Олар экономика 0,1%-ға төмендейді деп болжаған. Құлдырау негізгінен қызмет көрсету, өндіріс және құрылыс секторларында байқалған. Англия Банкі бұдан кейін британиялықтардың қалтасы жұқара түседі дегенге сенбейді. Қаңтар айында инфляция 4 пайыз деңгейінде сақталған. Бұл жағдай парламенттік сайлауға дайындалып жатқан Премьер-министр Риши Сунак үшін ауыр соққы болды. Саяси науқан осы жылдың соңында өтуі мүмкін. Үкімет басшысының берген негізгі уәделерінің бірі- экономиканы көтеру болатын.

Джереми Хант, Ұлыбритания қаржы министрі:

Инфляция төмендеп жатыр. Жалақы 6 айдан бері өсіп келеді. Егер табандылық танытсақ, тәуелсіз болжаушылардың пікірінше, жаздың басында пайыздық мөлшерлемелер төмендейді. Яғни, ипотекасы бар отбасылар үшін қолайлы болмақ.

Марина Бекенова