Атырау облысындағы елді-мекендерде қар суы тасып жатыр

Атырау облысы Қызылқоға ауданындағы елді-мекендерде қар суы тасып жатыр. Бүгін Ноғайты өзені арнасынан асып, Сағыз ауылдық округіндегі тұрғын-үйлерге қауіп төндірген. Қазір үйлердің айналасына арнайы бөгет салынған. Мұқыр ауылдық округіне қарасты Жантерек елді мекеніндегі мектеп шарбағының ішімен еріген қар суы жүріп жатыр. Әзірге мектепке келер қауіп жоқ. Оқушылар онлайн оқуға көшірілген. Сонымен қатар Миялы ауылындағы көшелерде қар шығару және су сору жұмыстары қарқынды жүргізіліп жатыр. Жұмыстарға 30 техника мен 100-ге тарта қызметкер тартылған.

Қайрат Нұртаев, Атырау облысы әкімінің орынбасары:

Ол жерде қорқатындай ештеңе жоқ. Үйлер ғимараттар суға кеткен жоқ. Ол мәселе қайдан туындап жатыр? Қазір күннің тез жылып кетуіне байланысты орын алып жатқан нәрселер. Бұл қардың сулары. Ол яғни уақытша бір-екі күнде өтетін сулар ғой.