Петропавл жылу орталығында жұмысшы тапшы

Петропавл жылу электр орталығына 500 жұмысшы жетіспейді. Басты себеп – жалақының аздығы. Қазір кәсіпорында 2 мың адам еңбек етеді. Өңірге жұмыс сапарымен барған Мәжіліс деутаты Ирина Смирнова жылу орталығының ұжымымен кездесті. Компания басшылығының сөзінше, қазіргі тариф еңбекақыны көтеруге мүмкіндік бермейді. Нысанда жөндеу жұмыстары жалғасып жатыр. Инвестициялық бағдарлама аясында төрт қазандық, екі мұржа күрделі жөндеуден өткізіледі.

Ирина Смирнова, ҚР Парламенті Мәжілісінің депутаты:

Жұмыс қиын әрі қауіпті. Сондықтан мұнда жас мамандар келмейді. Бұл мәселе мемлекет деңгейінде шешілуі тиіс. Жалақыны облыс немесе республикадағы орташа көрсеткішпен теңестіру қажет. Мұндай кәсіпорындарда еңбек ететін адамдардың зейнет жасын азайту керек деп есептеймін. Бұл мәселені депутат ретінде бірнеше рет көтердім.

Эльмира Кәленова