Жаңалықтарды Telegram арнамыздан оқыңыз!
Жамбылда әкімдікке қарасты мекеменің басшылары мемлекет мүлкін талан-таражға түсірген. Талас ауданының тазалығына жауапты «Таза-Талас» кәсіпорнының басшылары өздерінің қызметтік көліктерін бөтен біреулерге заңсыз сатып жіберген. Коммуналдық мекеменің 44 жастағы директоры мен 59 жастағы орынбасары ақша жымқырудың арнайы жоспарын сызған. Сөйтіп, 5 жылдан бері теңгерімде тұрған төрт көлікті заңсыз есептен шығарады. Арнайы аукцион өткізбей жарамсыз көлік ретінде жалған құжаттарын жасап, сатып жібереді. Прокурорлар жалпы құны 17 млн теңгені құрайтын «КИА спортейж», «КИА Каденза» және «Приора» автокөлігін мекемеге қайтарды. Ал 5 млн теңге тұратын төртінші көлікті қайтару шаралары жүруде. Мекеме басшылары «жымқыру» және «қызметтік жалғандық» бабы бойынша қамауға алынған. Олардың қылмысы дәлелденсе, 7 жылдан 12 жылға дейін бас бостандығынан айырылуы мүмкін.
Данияр Әлімқұл
