Құлағында туа бітті кемістігі бар балалардың ата-аналары елімізден ем таппай сенделіп жүр

Құлағында туа бітті кемістігі бар балалардың ата-аналары елімізден ем таппай сенделіп жүр. Шетелде ота жасату тым қымбат. Бір құлаққа шамамен 50 млн теңге. Ал мемлекет тарапынан бұл ауруға ота жасау үшін квота бөлінбейді. Мәселені бүгін Мәжіліс депутаттары көтерді. 

Қарағандылық Ақнұр Рахметуллинованың екі жасар ұлына екі жақты Микротия Атрезия диагнозы қойылған. Сәбидің екі құлағы да естімейтінін ол өзге қалаларда ақылы скринингтерден өту арқылы дәлелдеген. Бірақ мүгедектігін рәсімдей алмапты. Себебі бізде ауруы қатты ушыққандар ғана мүмкіндігі шектеулі деп танылады екен дейді ол.

Ақнұр Рахметоллинова, Қарағанды қаласының тұрғыны:

3-4 дәрежеге ғана беріледі дейді. Сонда екінші степеньда бала естімейді аппаратсыз. Қазір бала өсіп жатыр. Өсіп жатқанда қазір аппаратын шешіп тастасам мама не слышу мама не слышу дейді. Сонда нені күтуіміз керек? Неге туғаннан бастап инвалидность берілмейді?

Қазір Қазақстанда 600-ден астам балаға Микротия Атрезия диагнозы қойылған. Алайда оларды толық емдеп шығу мүмкін болмай тұр. Отандық дәрігерлер бас сүйекке жасанды есту аппаратын орнатады. Есту қабілеттін қалыпқа келтіретін ота жасау үшін шетелге квота да рәсімделмейді.

Вячеслав Дудник, ҚР Денсаулық сақтау министрінің орынбасары:

Иә, біз шетелге ота жасатуға жібере аламыз. Алайда мұндай квота Қазақстанда жоқ ем шаралары үшін ғана беріледі. Ал біздің базада еуропа елдерінің стандартына сай тәсіл пайдаланылады. Ол 5 жастан асқан балаларға ғана жасалады. Сондықтан шетелге квота бере алмаймыз.

Ал бір құлағы естімейтін балалардың жағдайы, тіпті қиын. Елдегі ереже бойынша олар мүгедектік те ала алмайды. Жиынға Алматыдан арнайы келген Ерболат Қуанышев денсаулық сақтау министрлігіне мынадай ұсыныс айтты.

Ерболат Қуанышев, Алматы қаласының тұрғыны:

Біздің сұрап отырғанымыз бізге бір құлақты балаларға инвалидность берсін. Себебі көп қаражат керек. қаралып тұру керек. Бала көп ауырады. Екінші тараптан өзіміздің мемлекетіміздегі маманды АҚШқа барып, қалай да болса жолын тауып, сол жақта оқытып келу.

Ата-аналар АҚШ-ты тегін таңдап отырмағандарын айтты. Өйткені әлемде табиғи есту қабілетін қалыпқа келтіре алатын ең тәжірибелі маман АҚШ-та деді. Алайда Денсаулық сақтау министрлігі оның тәсілін меңгеруге құлықсыздық танытып отырғанын түсіне алар емес. Есесіне сәтті отасының саны аз үндістандық маманмен тығыз байланыста дейді ата-аналар. Мәжіліс депутаттары мәселені жылдам шешу керектігін, қажет болса заңдық тұрғыда қолдау жасауға дайын екендерін айтты.