Жаңалықтарды Telegram арнамыздан оқыңыз!Шымкенттің республикалық маңыздағы дербес қала мәртебесіне ие болғанына 5 жыл толды. Қала күні мерекесіне тарту ретінде бүгін тұрғындарға алты бірдей жаңа нысан пайдалануға берілді. Оның ішінде білім беру, спорт нысандары мен демалыс орындары және оқушылар сарайы бар.
Балалар шығармашылығын дамыту орталығында 2 мың бала білім жолындағы ізденісін жетілдіріп, спортпен шұғыладанады. Өнер үйреніп, қолөнер бұйымдарын жасауға машықтанады. Мұнда 7 бағыт бойынша 30-дан астам үйірме жұмыс істейді.
Меруерт Медетбекова, қала тұрғыны:
Спорт, білім, ғылым, интелектуалды арттыратын, вокал, драма, одан бөлек жас модельерлер. Қандай керемет! Әр балаға қандай бағытта дамығысы келсе есігі ашық. Өте қуаныштымыз.
Қала күні мерекесінде мұнан бөлек ауыр атлетикадан спорт кешені ашылды. Мұнда кәсіби жаттықтырушылар злітемір көтеру, пауэрлифтинг және қол күресінен олипиада резервтерін дайындайды. Ал Абай саябағындағы скейт парк экстремалды спортқа арналған алғашқы алаңша болып отыр.
Сондай-ақ мерекеде ашылған суретшілерге арналған арт студия мен балаларға өнер мектебі де тұрғындарға үлкен тарту болды. Осындай кешенді жұмыстардың нәтижесінде балаларға қосымша білім беру көрсеткіші 82 пайызға жетті.
Мұрат Әйтенов, қала әкімі:
Қала 2025 жылға дейін 5 өнер мектебін салуды мақсат етіп отыр. Қазір екеуін салдық. Тағы да үш мектебіміз бар. Оған қоса мемлекет басшысының тапсырмасына сәйкес әрбір ауданда осындай оқушылар сарайы салынады деп жоспар қойып отырмыз.
Мегаполис атанған 5 жылдың ішінде шаһардың экономикалық әлеуеті де қарыштап өсті. 3,7 миллион шаршы метрден астам тұрғын үй салынды . Қала қазынасы 4 есеге көбейді. Осының барлығы қаланың әлеуеті мен шырайын күн санап арттырып келеді.
Ғани Қалмаханов
