Шетелдік көліктерді заңдастыру 1 шілдеден кейін де жалғасуы мүмкін

Шетелдік көліктерді заңдастыру 1 шілдеден кейін де жалғасуы мүмкін. Ішкі істер министрлігінің хабарлауынша, құжат қабылдау 23 қаңтардан басталғанына қарамастан, қазақстандық нөмірді алып үлгермегендер мен белгілі бір шектеуге байланысты заңдастыра алмағандар көп. Бүгінге дейін 365 мыңнан астам адам өтініш тастаған. Ал оның 144 мыңға жуығы ғана бастапқы тіркеуден өтіпті. 14 мыңнан астам автомобильді әлі тексеріп жатыр. Бұған дейін құжат қабылдау мерзімін ұзартуды мәжіліс депутаттары да талап еткен еді. Олар шетелдік көлік арзан әрі сапалы, бүгінде көптеген қазақстандыққа отбасын асыраудың негізгі құралы болып отыр деген еді. Министрлік тиісті құжатты 23 маусымға дейін қоғамдық талқылауға салмақ.

Айя Мүтәлі