Жаңалықтарды Telegram арнамыздан оқыңыз!Жамбыл облысының екі ауданында сібір жарасы анықталды. 4 адам қауіпті індетті жұқтырған.Тамды ауылы 15 күндік карантинге жабылып, блок-бекеттер қойылды. Өңірдегі тілшіміз Данияр Әлімқұл тарқатады.
Данияр Әлімқұл, тілші:
Талас ауданындағы Тамды ауылы енді екі апта бойы ет пен сүт өнімдерін сыртқа тасымалдамайды. Төрт-түлікті де кіргізіп, шығаруға шектеу қойылған. Блок-бекеттерде көліктердің жүк салғышына дейін тексерілуде.
Рауан Асқаров, Тамды ауылының әкімі:
Ауылдағы барлық малдарға екпе жұмыстары жасалып жатыр, қой, ешкі, сиыр. Барлығына санитарлық жұмыстар жасалуда.
Данияр Әлімқұл, тілші:
Кесел жұқтырған үш адам аудандық ауруханада жатыр. Жағдайлары бірқалыпты. Олар күйдіргіні сиыр сойған кезде жұқтырған. Бірақ қасапқа түскен малға аурудың қайдан келгені белгісіз. Ірі қараның етін өртеп жіберген. Науқастармен байланыста болған 35 адам тексеріліп жатыр.
Сондай-ақ Жуалы ауданындағы Көлтоған ауылының 46 жастағы тұрғыны да сібір жарасын жұқтырды. Оның жағдайы жақсы. Мамандар ауданда жаппай тексеру жұмыстарын бастады.
Данияр Әлімқұл
