Тәжікстан президентінің Қазақстанға мемлекеттік сапары аясында 9 құжатқа қол қойылды

Тәжікстан президенті Эмомали Рахмонның елімізге жасаған мемлекеттік сапары аясында 9 құжатқа қол қойылды. Президенттер сауда-экономикалық ынтымақтастықты нығайтуға, соның ішінде өзара тауар айналымын арттыруға, өнеркәсіп, ауыл шаруашылығы, көлік және цифрландыру салаларындағы қатынастарды дамытуға уағдаласты.

Қасым-Жомарт Тоқаев Тәжікстан Қазақстанның сенімді стратегиялық серіктесі, әрі бауырлас, жақын мемлекет екенін атап өтті. Оның айтуынша екі ел арасындағы сауда айналымы былтыр 18,5 пайызға артқан. Бұл қазіргі жағдайда, жақсы нәтиже - деді президент. Алдағы уақытта бұл көрсеткішті 2 миллиард долларға жеткізу көзделген. Ал келісөздерден кейін Қасым-Жомарт Тоқаев әріптесі Эмомали Рахмонды Алтын қыран орденімен марапаттады.