Петропавлды жағымсыз иіс жайлады

Петропавлды жағымсыз иіс жайлады.

Бұл жыл сайын қайталататын құбылыс. Мамандардың айтуынша, қала іргесінде орналасқан био-тоғандағы мұз еріп, айналаға күкіртсутегі газы тарап жатыр. Бүгін шаһардың барлық ауданында қолқаны қабатын иіс сезілді.

Архат Орынбеков, қала тұрғыны:

Терезе де аша алмаймыз. Далада міне, жүреміз. Бірақ енді әрең дегенде. Жүрек айниды. Ол көптен-көп аурулар туғызады. Бала-шаға, бәріне зиян ғой, негізі.

Био-тоғанның ашылғанына 70 жылдан асқан. Жағымсыз иістен арылу үшін сыйымдылығы 12 млн текше метр нысан тазалануы тиіс. Осы мақсатта былтыр 5 жылға арналған жоба қабылданды. Био-тоғанға күкіртсутегі бөлетін бактерияларды жоятын 400 мың литр «хлорелла» балдыры жіберілді. Алайда құны 125 млн теңге тұратын жоба әзірге нәтиже берген жоқ.

Дамир Жұмабаев, Экология департаментінің бөлім басшысы:

Бүгін ауа құрамындағы күкіртсутегінің мөлшері тиісті нормадан асып кетті. Биотоған жақын орналасқан аудандарда иіс қатты сезіледі. Біз үш бекетте ауа сапасын тексердік. Шамадан тыс ластану көрсеткіші тіркелген жоқ.

Эльмира Кәленова