Сайлауда Шымкент қаласының жұртшылығы да ерекше белсенділік танытып жатыр

Бүгінгі саяси шарада жастардың да белсенділігі өте жоғары. Бұл жолғы сайлауда жастар саяси науқанға алғаш рет қатысып, өз таңдауын жасамақ. Олар елдің саяси жүйесін кешенді жаңартуды еліміздің дамуы мен өркенуіне тікелей әсер етеді деген пікірде.

Сайлау учаскелерінің жабылуына бір сағаттан аз уақыт қалды. Соған қарамастан мегаполисте жасақталған 330 сайлау учаскесінде таңертеңнен басталған қарбалас бір сәтке де саябырсыған жоқ. Оның 23-і жабық мекемелердегі учаскелер. Халық санының артуына байланысты осы сайлаудағы дауыс берушілердің саны 8 мыңнан астам адамға артып отыр. Яғни мегаполисте 639 мыңнан астам азамат дауыс беру құқына ие.