Жаңалықтарды Telegram арнамыздан оқыңыз!
Бір жыл бұрын Президент Қасым-Жомарт Тоқаев елімізді саяси жаңғыртудың ауқымды бағдарламасын ұсынды. Содан бергі уақытта көптеген оң өзгерістер болды. Бірқатар әкімшілік-аумақтық құрылым өзгерді. Абай, Жетісу және Ұлытау облыстары құрылды. Алматы облысының орталығы Қонаев қаласына көшті. Әріптесім Қуан Нұрақын өңірдегі өзгертістерді айтып бермек. Қуан, Қонаев қаласы алдағы уақытта қалай дамиды?
Қуан Нұрақын, тілші:
Иа, Армангүл! Алдағы екі жылда шахарға 100 млрд теңге инвестиция тартылады. Бұл өндіріс, туризм, ауыл шаруашылығы сынды маңызды салаларды дамытуға жұмсалады. Қазір шаһардың бас жоспары дайындалып, мемлекеттік сараптамаға жіберілді. Оған сәйкес қаладағы кәріз жүйелері толығымен жаңартылып, жарық және жылу желілеріне күрделі жөндеу жүргізілмек. Шаһар облыс мәртебесін алғалы мұндағы инфрақұрылымды жаңарту жұмыстары қызу жүріп жатыр. Жолдар жөнделіп, саябақтар мен аулалар абаттандырылды. Қала күннен күнге өзгеріп жатыр дейді тұрғындар. Алда қала аумағы кеңейіп, жаңа шағын аудан қосылады. Онда балабақша мен емхана салу жоспарланған. Қазірдің өзінде мұнда көпқабатты үйлер мен 900 орынға шақталған мектептің құрылысы жүріп жатыр. Шаһар билігі Қапшағай су қоймасының жағалауынынан қала тұрғызуды жоспарлап отыр. Ол үшін 1800 гектар жер әзірленген. Аумақта 100-ден астам көппәтерлі үй бой көтереді. Ал, халық саны 4 есеге дейін көбейіп, 50 мың жаңа жұмыс орны ашылмақ.
Қуан Нұрақын
