Африканың оңтүстік жағалауында «Фредди» дауылы соқты

Бүгін Африканың оңтүстік жағалауына «Фредди» тропикалық дауылы соққы берді. Соның салдарынан Мозамбик пен Мадагаскарда кемінде 27 адам қаза тапқан. Және де алапат желдің екпінінен кейбір аудандарда ағаштар құлап, үйлер зақымданды. Метеорологтардың ескертуінше, дауыл қайталанған жағдайда Мозамбиктің өзінде жарты миллионнан астам адам үлкен қауіпке душар болуы мүмкін.

Ал Австралияның солтүстік-батысында төпелеп жауған жаңбыр соңы алапат тасқынға ұласты. Сондықтан Квинсленд провинциясында ондаған адам биік жерге көшірілген.

«Рейтер» агенттігінің хабарлауынша, құтқару операцияларына полицейлер мен тікұшақтар да тартылып жатыр. Дегенмен, зардап шеккен адамдар туралы мәлімет әзірге түскен жоқ.

Арыстан Рысбек