Ауғанстанға Халықаралық көмек азаюы мүмкін

Ауғанстанда әйелдер құқығының тапталуы Кабулге халықаралық көмекті азайтуы мүмкін. Мұны Біріккен Ұлттар Ұйымының Ауғанстан жөніндегі арнайы елшісі Роза Отынбаева ескертті.

Аталған ұйым Ауғанстанға жәрдем ретінде биыл 4,6 миллиард доллар жинауға өтініш жасады. Өйткені, ауған халқының үштен екі бөлігі гуманитарлық қолдауға өте мұқтаж.

Еске салайық тәліптер билікке 2021 жылы қайта келді. Содан бері Ауғанстанда қыз балалардың орта мектептер мен университеттерде оқуына тыйым салынып отыр. Бұдан бөлек үкіметтік емес ұйымдарда жұмыс істеу құқығынан да айрылған.

Роза Отынбаев, БҰҰ-ның Ауғанстан жөніндегі арнайы елшісі:

Әйелдерге жұмыс істеуге рұқсат етілмесе, Ауғанстанды қаржыландыру қысқаруы мүмкін. Мысалы, әйелдер басқаратын үкіметтік емес ұйымдардың қызметін тоқтатуға тура келіп отыр. Сонымен қатар, АҚШ долларымен жіберілетін қолма-қол ақша да азаюы мүмкін. Кейбір әйелдер тәліптердің билікке келуін тіпті құптаған. Себебі соғыс аяқталды. Бірақ көп ұзамай үміт үзіле бастады. Себебі әйелдер үшін қоғамдық өмірден алшақтау өлімнен қорқудан артық болмай тұр.

Арыстан Рысбек