Түркиядағы тағы бір қазақстандық құтқарушының сәбиі дүниеге келді

Түркияға кеткен тағы бір қазақстандық құтқарушының сәбиі дүниеге келді. Олжас Рахметов төртінші перзентіне «Адэля» деп ат қойған. 2 аптадан бері қауіптің ортасында жүрген құтқарушыны енді үй-іші аман-есен елге оралуын тілеп, асыға күтіп жүр.

Олжастың Түркиядағы жұмысы қауырт. Қирандылар астынан аман қалғандарды алып шығу үшін күн-түн демей еңбек етіп жүр. АСТАНА Қолы қалт еткенде уақыт тауып, бізбен байланысқа шықты.

Олжас Рахметов, құтқарушы:

Қуанып отырмын. Алла жазса, үйге келіп, балаларымды көремін. Сағындым балаларымды. Осы қиыншылықтан өтсек дейміз. 

Өзге елде жүрген отандасымыздың шаңырағына да бардық. Үйде қалған 3 ұлы Түркиядағы әкесінен бөлек, перзентханадағы анасын да сағынып жүр.

Олжас соңғы 6 жылын осы салаға арнаған. Өз өміріне қауіп төнсе де, басын бәйгеге тігіп адамдарды судан да, өрттен де құтқарады. Ауа-райына, тіпті уақытқа да қарамай, тауға шығып, тасқа өрмелеуге дайын. Ержүрек ұлын анасы мақтан тұтқанымен, мұндай қауіпті операцияларға жіберу әркез оңай емес деп көзіне жас алды.

Сарқыт Рахметова, құтқарушының анасы:

Келіншегі босанғанда бір жеңілдеп қалдық. Екеуін де уайымдап кеттім. Енді аман-есен ұлымның үйіне оралуын жазсын. Балапанымды бір құшақтап, бетінен бір сүюге жазсын деймін.

Олжас үйінің жалғыз асыраушысы. Әйелі 4 перзентімен үйде отырады. Жас отбасы бүгінде құтқарушыларға төленетін 150 мың теңгеге жан бағып отыр. Өз өмірін қатерге тігіп, қауіптің ортасында жүргендер үшін мұндай жалақы жеткіліксіз, дейді Олжастың анасы.