Президент сенім грамоталарын қабылдады

Бүгін Ақордаға бірнеше елдің дипломаттары келді. Швеция, Грузия, Мьянма және Кипр елдерінің жаңадан тағайындалған елшілері Мемлекет басшысына сенім грамоталарын тапсырды. Қасым-Жомарт Тоқаев оларды Қазақстандағы миссиясының ресми түрде басталуымен құттықтап, екіжақты байланыстарды одан әрі нығайту жұмыстарына табыс тіледі. Қазақстанның достық және өзара тиімді қарым-қатынастарды нығайтуға бағытталған бейбіт әрі ашық сыртқы саясат жүргізіп отырғанын айтты. Мемлекет басшысы дипломаттардың жұмысына Үкімет тарапынан жан-жақты қолдау көрсетілетінін атап өтті. 

Николоз Лалиашвили, Грузияның Қазақстандағы төтенше және өкілетті елшісі:

Қазақстан мен Грузияның байланысы бұрыннан бекем. Соңғы жылдары біздің қарым-қатынасымыз жоғары деңгейге жетті. Дегенмен туризм, транспорт, сауда-саттық салаларында әлі де мүмкіндігіміз көп. Әсіресе «Орта дәліз» деп аталатын сауда жолына үлкен үміт артып отырмыз.

Ева Ульрика Пулано, Швеция корольдігінің Қазақстандағы төтенше және өкілетті елшісі:

Швеция Қазақстан Президентінің реформаларын жүзеге асыруда өте жақсы серіктес. Біз инфрақұрылымды дамыту, айти және телекоммуникация салаларын жаңғырту мен университеттер арасында студенттер алмасу жұмысын жалғастыруды көздеп отырмыз.

Шерхан Жамбылұлы