Шанхайда локдаун ережелері жеңілдетілді

Қытайдың қаржылық хабы - Шанхай тұрғындары үшін локдаун талаптары жеңілдей бастады. Бүгіннен бастап қоғамдық орындарға кіру үшін коронавирусты анықтайтын тесті тапсыру міндетті емес. «Рейтер» агенттігінің хабарлауынша, алдағы күндері локдаунды жеңілдетуге бағытталған жалпыға ортақ жаңа ережелер жария етілмек. Билік ковид шектеулерін жақында өткен жаппай шерулерден кейін алып тастай бастады. Шанхай тұрғындары бұл жаңалықты қуанышпен қабылдаса да, алаңдайтын тұстар баршылық дейді.

Кенди Ву, Шанхай тұрғыны:

Бұл өте жақсы жаңалық. Дегенмен мені ковидтік шектеулердің күллі ел аумағында жеңілдетіле бастауы алаңдатып отыр. Кейін вирустың мутациясы шықса, не болады? Сондықтан ережелерді баяу, біртіндеп өзгерткен дұрыс.