Жаңалықтарды Telegram арнамыздан оқыңыз!
2050 жылға қарай климаттың өзгеруінен Орталық Азия әлемдегі ең сезімтал аймаққа айналуы мүмкін. Табиғи апаттардың алдын-алу үшін аймақ елдері күш біріктіруі тиіс. Брюссельде Орталық Азия, ЕуроОдақ пен БҰҰ-ның өкілдері бас қосып, табиғи апаттардың қаупін төмендету жайын пысықтады.
Шараны Қазақстанның Бельгиядағы елшілігі БҰҰ апаттың қаупін азайту басқармасының қолдауымен ұйымдастырды. Соңғы 30 жылда Орталық Азияда 140-тан астам гидрологиялық, эпидемиологиялық және басқа да апаттар орын алды. 10 млн-дай адам зардап шеккен. Экономикаға 3,7 млрд доллар шығын келді.
Тери Хакала, Еуропалық Одақтың Орталық Азия бойынша арнайы өкілі:
Біз қаржыландырып отырған Орталық Азиядағы жобаның жарияланғанына 4 жыл болды. Климаттың өзгеруі, табиғи апаттар, қауіп-қатерлер аймақта әлі сейілген жоқ. Апатпен күресу үшін ауызбіршілікті арттырып, техниканы жаңартуымыз керек.
Мами Мизутори, БҰҰ Бас хатшысының апаттың қаупін төмендету бойынша арнайы өкілі:
Орталық Азиядағы табиғи қауіп-қатерлермен күресте Алматыдағы төтенше жағдайлар мен табиғи апаттардың қаупін төмендету орталығының атқарып отырған еңбегі зор. Осы қызметі үшін орталыққа, Қазақстанның көшбасшылығына алғысымыз шексіз.
Нұрсұлу Қасым
