Жаңалықтарды Telegram арнамыздан оқыңыз!Астанада табысы күнкөріс деңгейіне жетпейтін төрт санаттағы азаматтарға көмір алу үшін 50 мың теңгеден беріліп жатыр. Көмекті алу үшін қалалық жұмыспен қамту басқармасына хабарласу қажет. Іс-шара келесі жылдың 30 сәуіріне дейін жалғасады. Ал, қалада қатты отынның өзі жеткілікті ме, бағасы қандай?
Бұл Астананың 40-шы станция аймағындағы темір жол тұйығы. Қаладағы көмір сататын ең үлкен орындардың бірі. Мұнда жылдағыдай ұзын-сонар кезек пен дүрбелең жоқ. Себебі, көмір жеткілікті, - дейді мамандар.
Алтынбек Есжанов, көмір сататын орынның қойма меңгерушісі:
Біз тамыздан бастап сатып жатырмыз, соның әсерінен қазір даурығу жоқ. Көп халық алды.
Қойма меңгерушісінің сөзінше, вагондар кемі екі күн сайын келіп жатыр. Бірақ, сатып алушылар Шұбаркөл көмірінің аз екенін айтады.
Нәсіпбек Мұстафин, көмір сатып алушы:
Қазір неміс пешін жағады, Шұбаркөл ғана керек. Нашар кеп жатыр. Мына бізде Абай мен Жұбанов көшесінде сатылады, бірақ оған мүлдем келмейді.
Аманкелді Сейтхан, тілші:
40-шы станция тұйығына бүгін ғана жеткізілген 300 тонна көмір міне, 1 сағатта сатылып кетті. Ал, негізі қазақстандықтар жылына 10 млн тонна көмір тұтынады. Соның ішінде Шұбаркөлге сұраныс көп, бірақ Шұбаркөлде жылына 3 жарым млн тонна шығарылады. Сондықтан кейде көмір жетпей жатады.
Теміржол тұйықтарында Шұбаркөл көмірінің бағасы 13 850 теңге. Бірақ Жібек Жолы, Талапкер, Қосшы, Қоянды және Аршалыға жеткенше тасымалдау құны қосылып, қымбаттайды.
Бағдат Мамыраев, тасымалдаушы:
Жеткізу ғой бізде. Қаланың сырты болса 20-25 мың, алыстаған сайын қымбатырақ болады ғой. Қосшы, Қояндыға қаншаға апарасыз осы жерден? Мен Жібек жолына апарам, арғы жағы 25 бергі жағы 20 мыңға.
Өндіріс ошақтарында да былтырғы баға сақталған, тек вагонмен тасымалдау бағасы 6 пайызға өскен. Ал, жауапты министрлік өкілдері Қазақстанда көмір көрші елдермен салыстырғанда ең арзан, - дейді.
Тұрар Жалмағамбетов, ҚР ИИДМ Республиканы көмірмен қамтамасыз ету штабының басшысы:
Ресей мемлекетінде көмірдің өзі бізде мысалы 15-20 мың болса, Ресейдің өзінде 50 мың теңгеден жетіп жатыр, Қырғызстанда 30 мың теңге. Дәл осы көмір Еуропа елдерінде қазір 10 есе көп, жалпы баға жөнінде бізде жеткілікті.
Елімізде көмір сатылатын 300-ге жуық теміржол тұйығы бар. Соларға қазірдің өзінде халыққа қажетті отынның 50 пайызы жеткізілген. Бұл соңғы жылдардағы ең жақсы көрсеткіш, - дейді жауаптылар. Өйткені, биыл жылыту маусымына дайындық көктемде басталған. Сондай-ақ, 8 облыста көмірге онлайн тапсырыс беру жүйесі іске қосылған.
Аманкелді Сейтхан
