Жаңалықтарды Telegram арнамыздан оқыңыз!Түркия президенті Режеп Тайип Ердоған Қазақстанға сапарын «ата-баба жеріндемін» деп бір ауыз сөзбен ғана сипаттаған. Бұл туралы жазбаны ол өзінің инстаграмдағы парақшасында жариялады. Ал, Азиядағы өзара іс-қимыл және сенім шаралары кеңесінің алтыншы саммиті – әлем назарында. Ол жайында бүгін шетелдің ірі медиа ұйымдары ақпарат таратып жатыр.
Солардың бірі – түріктің «Анадолы» агенттігі. Агенттік екі күндік жиында саяси, экономикалық, гуманитарлық және экологиялық мәселелермен бірге жаңа қауіп түрлері де талқыланатынын хабарлады.
Бұл саммит жайында Саудияның «әл-Арабия» телекомпаниясы да материал әзірлеп, Ресей мен Түркия басшыларының кездесуіне мән берген. Автордың айтуынша, Ердоған әлі де Путин мен Украина президенті Владимир Зеленскийді бейбіт келіссөздерге тартудан үмітті.
Осы тақырыпқа ВВС-де тоқталды. Оның дерегінше, бейсенбіде Қазақстан астанасында Путин мен Ердоғанның кездесуі өтеді. Ал Анкара соңғы айларда Ресей мен Батыс арасында арағайын болуға тырысып келеді. Сонымен бірге, британдық телерадиокорпорация тілшісі Түркияның Киевті қару-жарақпен қамтамасыз ете отырып, Мәскеуге қарсы ауқымды санкцияларды қолдамағанын да атап өткен.
Ал Қытайдың «Синьхуа» агенттігі мен China Daily газетінің жаһандық қызметі Азия кеңесінің алтыншы саммитіне ел делегациясын вице-президент Ван Цишань бастап барғанын хабарлады.
Арыстан Рысбек
