Ахмет Байтұрсынұлы туралы кітап ағылшын тілінде жарық көрді

Лондонда Ахмет Байтұрсынұлының 150 жылдығына орай конференция өтті. Ұлт ұстазы ұлықталған жиында ағылшын тіліне аударылған «Ахмет Байтұрсынұлы және Алаш» кітабының тұсауы кесілді. Оған қазақ мәдениетінің көрнекті қайраткерлері мен Алашты зерттеуші ғалымдардың еңбектері енген. Қазақстанның Біріккен Корольдіктегі елшілігі ұйымдастырған шараға британиялық шығармашылық интеллигенция өкілдері қатысты. Ағылшын ақын-жазушылары Ахмет Байтұрсынұлының өмірі және шығармашылығымен тереңірек танысуға мүмкіндік алды. Кітапты Ұлттық аударма бюросы басып шығарған. Тәржімасымен көркем аударма саласының маманы Арч Тэйт айналысқан.

Арч Тэйт, аудармашы:

Меніңше, бұл кітап Қазақстан тарихындағы ақтаңдақтардың бетін ашып, қазақ тілі мен әдебиеті туралы маңызды ақпаратты ағылшынтілді аудиторияға паш етеді. Ахмет Байтұрсынұлы Ресей патшалығы заманында қудалауға ұшыраса да, түрмеге тоғытылса да өзінің миссиясына адал болып, қазақ ұлты үшін басын бәйгеге тіккен адам.