Түркияда орман өрті өршіп тұр

Түркияның оңтүстік-батысында бірнеше күннен бері орман өртін сөндіру мүмкін болмай жатыр.

Тілсіз жау адамдар тұратын аумақты шарпыған. Қауіпсіздік шарасы ретінде жүз елуден аса тұрғын көшірілген. Жалынды сөндіруге 1500 маман, 360 арнайы техника, 20 тікұшақ пен ұшақ тартылды.

Әзірге өрттің неден тұтанғаны белгісіз. Дегенмен ғалымдар адам әрекетінен болған климаттың жылыну құбылысынан осындай оқиғалар жиілеуі мүмкін деп дабыл қағып отыр.

Былтыр Түркияда болған алапат орман өртінен ондаған мың гектар аумақ күлге айналған еді.