Жаңалықтарды Telegram арнамыздан оқыңыз!Нұрсұлтан Назарбаевтың Конституциядағы мәртебесіне қатысты «тоқетерін» айтайық. «Қазақстанның тұңғыш президенті – Елбасы туралы заң» жойылатыны бұған дейін белгілі болған. Өткен аптада ғана реформа бойынша жұмыс тобы 91-баптың 2-тармағында «Тәуелсіз Қазақстанның негізін салушы» деген тіркесті ғана қалдырып, «Елбасы» деген сөзді, оның мәртебесіне қатысты өзге дүниені алып тастауды ұсынған еді. Осы жетіде мемлекеттік хатшы telegram-да тағы бір жаңалықты жариялады. Ерлан Қарин «жұмыс тобындағы кейбір мүшелердің ұсынысы ескеріліп, Конституциялық Кеңеске Тұңғыш Президенттің мәртебесіне қатысты норманы алып тастау туралы қосымша ұсыныс жолданды», -деп жазған.
Жұмыс тобының сол кейбір мүшелері Нұрсұлтан Назарбаевтың «тарихи рөлі» онсыз да жалпыға мәлім, сондықтан Конституцияға бекітудің қажеті жоқ, - деген ойды негізге алып отыр екен. Конституциялық Кеңес бұл ұсынысты мақұлдап, одан кейін іле-шала референдум туралы заңға да түзетулер енгізілді. Өйткені бұл құжатқа сәйкес «Тұңғыш Президент мәртебесіне қатысты мәселені референдумда көтеруге болмайтын» еді. Сенат сол норманы алып тастап, заң жобасын мәжіліске кері қайтарды.
