Жаңалықтарды Telegram арнамыздан оқыңыз!Жаз басталысымен Ақмола облысының археологтары ескерусіз қалған тарихи ескерткіштерге зерттеу жұмыстарын жүргізеді.
Биыл экспедициялық топ Зеренді ауданының Кеңөткел ауылындағы қорғандарды зерттеуге кірісті.
Бүгінгі күнге дейін 6 қорғаннан 38 тарихи жәдігер табылды.
Бұл экспедиция Табиғи-мәдени мұраны қорғау және пайдалану орталығының ұйымдастыруымен жүргізілуде.
Орталық қызметкерлерімен қоса, зерттеу жұмысына Көкшетаудағы Абай Мырзахметов атындағы университеттің тарих факультетінен 20-дан аса студент қатысты. Солардың бірі - Руслан Қайыргелдинов.
Руслан Қайыргелдинов, студент:
Мен археологиялық жұмыстарға І курста іс-тәжірибе ретінде қатыстым. Міне, содан бері археологиялық зерттеу жұмыстарымен айналысып жүргеніме 4 жыл болды.Әрбір тарихшы өзінің жеріне қатысты көне жәдігерлерді өз қолымен ұстап көруі керек ,деп ойлаймын. Бұл іс өте қызықты.
Экспедициялық топ осы уақытқа дейін Кеңөткел ауылындағы 6 қорғанға зерттеу және қайта қалпына келтіру жұмыстарын жүргізді.
Табылған жәдігерлердің ішіндегі ерекшесі - бесінші қорғаннан алынған құмыра.
Онда арий тайпасының белгісі бейнеленген. Бұл тайпаның өмір сүру кезеңін Андронов мәдениетімен байланыстырады. Олар көшіп-қону кезінде осы өңірді мекендеген. Археологтардың айтуынша, арий тайпасының қорғандары біздің елде сирек кездеседі. Олар көбінесе Еуропа елдерінен табылатын көрінеді.
Серік Ысқақов, Ақмола облысы тарихи-мәдени мұраны қорғау және пайдалану орталығының бөлім меңгерушісі:
8 қыш ыдыс пен 30 қола бұйым таптық. Бұл Қошқарбай қорымында 150-ден астам археологиялық ескерткіш бар. Соның ішінде қола дәуірінен орта ғасыр дәуіріне дейін, әртүрлі заманға сай ескерткіштер бар.
Сондай-ақ, қорғаннан адам сүйектері табылды. Біздің дәуірімізге дейін 3 мың жыл бұрын өмір сүрген бұл адамдардың денелері ірі, әрі бойлары ұзын болған, дейді археологтар. Қорғандарды зерттеу жалғасуда.
Ерболат ТӨЛЕГЕНҰЛЫ
