Қаржы пирамидасын жарнамалаған танымал 3 блогер қылмыстық жауапқа тартылады

Шерхан Жамбылұлы, тілші:

ІІМ тергеу департаментінің басшысы Санжар Әділов қазір бұл іс аяғына жетіп қалғанын айтты. «Mudarabah Capital» мен күдіктілер және олардың туыстарына тиесілі біраз мүлік тәркіленген. Атап айтқанда Алматы қаласы мен облысы және елордадағы 4 жер учаскесі, 10 пәтер, 5 үй, 2 автокөлік және дүкенге арест қойылған. Бұның барлығы зардап шеккендердің шығынын өтеу мақсатында жұмсалуы мүмкін. Алайда оның барлығын тек қана сот шешеді. Бұл іске қатысты бірнеше блогердің есімі аталған еді. Атап айтқанда Мейіржан Төребаев, Мейірхан Шерниязов және Азим Саидбаев. Олар жұртты сан соқтырып кеткен компанияны белсенді түрде жарнамалап, көптеген адамдардың ақша салуына әсер етті. Азим Саидбаевтың қашып кеткені бұған дейін де айтылған еді. 

Санжар Әділов, ҚР ІІМ Тергеу департаментінің басшысы: 

 3 блогер осы қылмыстық іс бойынша күдікті деп танылды, екеуіне қатысты «кепіл» түріндегі, біреуіне «күзетпен ұстау» түріндегі бұлтартпау шарасы таңдалды. Күдіктілердің бірі тергеу органдарынан жалтарып жүр. Ол сырттай тұтқынға алынып, халықаралық іздеу жарияланды.

Шерхан Жамбылұлы, тілші:

Егер де блогерлер тек жарнамалап қана қоймай, компанияға қатысы бары дәлелденсе онда олар 5 жылдан 10 жылға дейін бас бостандығынан айырылуы мүмкін. Жалпы бұл компанияны құрды деп 14 адам күдікке ілініп отыр.