Шымкенттік жігіт аттракциондағы құздан құлап түсті

Аттракциондағы жасанды құзға өрмелеген шымкенттік жігіт денесін игере алмай, биіктен құлап түсті. Қайғылы оқиға кешкі сағат 8:30 шамасында болған. Альпинистік қабілетін байқап көрмек болған 20 жастағы азамат 4-5 метр биіктіктен тайып кеткен. Ол ес-түссіз күйде бірден жедел жәрдем қызметінің көлігімен ауруханаға жеткізілді. Дәрігерлердің айтуынша, бас сүйегі зақымданған. Қазір жансақтау бөлімінде жатыр. Осы оқиғаға байланысты аттракцион жұмысы тоқтатылды. Шымкент қаласы әл-Фараби аудандық полиция басқармасы тергеу жүргізуде. Тұтынушының өмірі мен денсаулығына қауіп төндіретін жұмыстарды орындау немесе қызмет көрсету бабы бойынша іс қозғалды.

Лаура Нақыпқызы, қалалық Денсаулық сақтау басқармасының баспасөз хатшысы:
Дәрігерлер науқасты тексеру кезінде бас сүйегінің жарақаттанғанын анықтап, шұғыл түрде ота жасады. Қазір науқастың жағдайы ауыр. Есін білмейді. Жансақтау бөлімінде комада жатыр.

Ғани Қалмаханов