Петропавлдағы мәдениет үйінің төбесі опырылып түсті

Петропавл қалалық мәдениет үйіндегі концерт залының төбесі опырылып түсті. Жапа шеккендер жоқ. Бүлінген аудан шамамен 500 шаршы метрді құрайды. Ғимараттың апатты жағдайда тұрғанын 5 ай бұрын хабарлаған болатынбыз. Сол кезде қалалық әкімдік өкілдері жобалық-сметалық құжаттар әзірленіп, қаржы бөлінгеннен кейін нысан жөнделетінін айтқан еді. Алайда ешқандай жұмыс атқарылмаған. Мәдениет үйінің ғимараты 90 жыл бұрын салынған. 2012 жылы бастан-аяқ жөнделген. Бірақ концерт залының төбесі ауыстырылмаған. Бұл жерде шығармашылық ұжымдармен қатар оқушыларға арналған 25 үйірме жұмыс істеп келген еді. Қазір 500-ден аса бала қаладағы басқа орталықтарға барып жүр.

Элмира Кәленова