Шымкентте баласын сатпақ болған көпбалалы ана сотталды

Шымкентте көпбалалы ана бір миллион теңгеге өз баласын сатпақ болған. Осы әрекеті үшін ол жеті жылға бас бостандығынан айырылды. Төрт баланың анасы сәбиінен перзетханада-ақ бас тартпақ болған. Кейін баласын сатқысы келетінін таныстарына айтқан.

Мұны естіген полиция қызметкерлері бала сүйе алмай жүрген отбасы кейпінде әйелдің үйіне барғанда баланы «тауар» ретінде көрсеткен. Қылмыс үстінде ұсталған жалғызбасты ана ақша жетпегеннен кейін осындай қадамға баруға мәжбүр болғанын айтқан.

Сондай-ақ, Шымкентте тағы бір көпбалалы отбасының бала сатпақ болғаны анықталды. Бұл әрекеті үшін олар сегіз жыл шартты жазаға тартылған.