Павлодар облысында мектеп қаржысын жымқырған есепші тағы қамауға алынды

Павлодар облысы, Железинка ауданында мектеп қаржысын жымқырғаны үшін сотталған есепші әйел жыл өтпей жатып, балабақшаның 6,5 млн теңгесін жымқырған. Енді осы қылмысы үшін 2 жыл 2 ай тар қамақта отырады. Бюджет қаржысын миллиондап ұрлауды кәсіп қылған бұл азаматтың мемлекеттік мекемеге екінші мәрте жұмысқа қалай алынғаны әзірге жұмбақ. Себебі ол 2 жыл бұрын жергілікті мектептің 8 млн теңге қаржысын ұрлап, 2 жылға сотталған. Бірақ былтыр мерзімінен бұрын босап шығыпты. Содан бергі айналасы 8 ай ішінде балабақшаға жұмысқа тұрып, екі ұлының есеп картасына 6,5 млн теңгені аударып жіберген.

Бұны Ішкі мемлекеттік аудит департаменті анықтады.    

Болат Аманбаев