Елордада «Елім деп соққан жүректер» атты мерекелік концерт өтіп жатыр

Тәуелсіздіктің 30 жылдығына орай «Қазақстан» орталық концерт залында «Елім деп соққан жүректер» атты мерекелік концерт өтіп жатыр. Бұл шара еліміздің мәдениет саласына үлес қосқан тарихи тұлғаларға арналады. 

Ақниет Балтанова, тілші:

Елімізде мәдениет саласының дамуына үлес қосқан тарихи тұлғалар көп. Яғни бұл тізімге кино мен телевизия саласының, театр өнерінің майталман мамандары мен ақын-композиторларды, әдебиет саласының үздіктерін жатқызуға болады. Демек бүгінгі кеш осы Тәуелсіздік жылдары ішінде төл өнерімізді дамытып, талантымен елімізді әлемге танытқандарға арналады. Олардың қатарында Шәмші Қалдаяқов, Ескендір Хасанғалиев, Кеңес Дүйсекеев, Нұрғиса Тілендиев сынды композиторлар, Тұманбай Молдағалиев, Шөмішбай Сариев сынды ақындар, Батырхан Шүкенов, Болат Сыздықовтай әнші-музыканттар бар.

Жеңіс Сейдоллаұлы, «Қазақконцерт» мемлекеттік концерттік ұйымының директоры:

Шараның мақсаты - өмірден өткен өнер майталмандарын еске алу. Оларды халық білуі керек,  мұны ұрпақтар сабақтастығының жалғасы ретін ұйымдастырып отырмыз. Біз ағаларымыздан үйрендік, енді біз үйренген дүниемізді кейінгі ұрпаққа беріп жатырмыз. Қазақстан мәдениетінің туы әрқашан биікте желбіреп тұратынына сенемін.  

Ақниет Балтанова, тілші:

Мерекелік кеште Роза Рымбаева, Айжан Нұрмағамбетова, Медеу Арынбаев, Жеңіс Ысқақова, Құрмаш Махан, Рүстем Нұржігіт, Ерлан Рысқали, Азамат Жылтыркөзов, Азат Малик, Әміре, Рухия Байдүкеновадай «Қазақконцерт» ұжымының әртістері өнер көрсетуде. Сондай-ақ эстрада-симфониялық оркестрлердің музыканттары да бар. 

Ақниет Балтанова