Жаңалықтарды Telegram арнамыздан оқыңыз!Жамбыл облысының Байзақ ауданындағы жарылыстан зардап шеккен тұрғындардың соңғы легі үйлеріне оралды. Бүлінген баспаналар екі айда қайта қалпына келтірілді. 26 тамызда Байзақтағы әскери бөлімнің оқ-дәрі қоймасында жарылыс болып, 17 адам қаза тапқан еді. 176 нысан бүлінді. Қазір оның 168-і толығымен жөнделді. Ал, мемлекет есебінен жөндеу жұмыстары жүргізілген Үшбұлақ, Жібек жолы және Қайнар ауылындағы 35 үй пайдалануға берілді. Сондай-ақ, зардап шеккен әр отбасына көмек ретінде 300 мың, кәсіпкерлер тарапынан 200 мың теңгеден қаражат берілді. Қорға түскен ақшаның есебінен тұрғындардың қора-жайлары да жөнделді. Мұнан өзге, Жібек жолы елді мекенінде салынып жатқан мектеп желтоқсан айының соңында тапсырылмақ.
Дәнегүл Сүйіндікова, Қайнар ауылының тұрғыны:Үйіміз аман-есен бітті, кірдік. Бұндай жағдайды ешкімнің басына бермесін, жарылыс болмасын. Дерттен аман өтіп, жақсы өмір сүрейік.
Қайрат Исмайл, Байзақ ауданы әкімінің орынбасары:Күрделі жөндеуден өтетін үйлер республикалық резервтен бөлінген қаржыға жасалды. 249 млн теңгеге толық үйлер қалыпқа келді.
