Бейнеу ауданында шаңды дауылдың салдарынан мектептер онлайн оқуға көшті

Еліміздің батыс өңірінде шаңды дауыл тұрып, жұрттың мазасын қашырды. Маңғыстау облысындағы Бейнеу ауданындағы автожолдарда тәртіп сақшылары күшейтілген жұмыс тәртібіне көшті. Өңірдегі тілшіміз Аягөз Оралбайқызы скайппен байланысқа шыққалы тұр. 

 Аягөз Оралбайқызы, тілші:

Облыс орталығы Ақтауда күн ашық. Аздап жел бар. Тек Бейнеу ауданында түске жақын ауа райы күрт бұзылып, шаңды дауыл тұрды. Салдарынан көшелерде жүру мүмкін болмай қалды. Осыған байланысты, аудан бойынша 24 мектепте екінші ауысымда оқитын 8 жарым мыңдай оқушы қашықтан оқуға көшірілді. Ал, аудан аумағынан өтетін республикалық маңыздағы автожолдарда полиция қызметкерлері күшейтілген жұмыс режиміне кірісті. Сондай-ақ, Атырау облысында да шаңды дауыл соқты. Әзірге оқыс оқиға тіркелмеді.

Аягөз Оралбайқызы