Жаңалықтарды Telegram арнамыздан оқыңыз!Қызылорда облысында 21 тұрғынның карантин талаптарын өрескел бұзғаны анықталды. Олар ПТР сынамасы оң нәтиже көрсете тұра, оқшауланбай, қоғамдық орындарға барған. Үй жағдайында отырудың орнына, серуен құрып жүргендер «Ашық» бағдарламасы арқылы анықталған. Олардың көбі қоғамдық тамақтану орындарында тіркелген. Өзгелерге індет жұқтыру қауіпін туғызған 6 адамға 87 мың теңгеден айыппұл салынды. Қалған 15-іне де хаттама толтырылған. Ең сорақысы, кейбір тұрғын өзінің коронавирус инфекциясын тасымалдаушы екенін біле тұра, бірнеше мәрте оқшаулану талабын бұзған.
Ерлан Ұзақбаев, қалалық Cанитариялық-эпидемиологиялық бақылау басқармасының басшысы:
Бір азаматшамыз екі рет үй карантинін бұзған. Тағы бір азаматша үш рет бұзған. Яғни әрбір дерек бойынша жеке-жеке 87 510 теңге айыппұл тағайындалуда. Барлық індетке шалдыққан азаматтарға тиісті түсіндірме жұмыстары жүргізіліп, қолдарына қолхат беріліп келеді. Алайда, тұрғындарымыз үй карантинін бұзуға жол беріп отыр.
Әділбек Серікұлы
