Жаңалықтарды Telegram арнамыздан оқыңыз!Дәрігерлердің мәртебесін арттырып, олардың құқығы мен мүддесін қорғайтын жоба әзірленді. Бұл туралы Денсаулық сақтау министрі Алексей Цой өзінің әлеуметтік желідегі парақшасында жариялады. Министр күні кеше Талғар аудандық орталық ауруханасында соққыға жығылған хирургтың жағдайын айтты. Сондай-ақ, даулы мәселелерді өркениетті қоғамда күш қолдану арқылы шешуге жол берілмейтінін де атап өтті.
«Медицина қызметкерін ұру - бұл ерекше назар аударатын жағдай. Бұл оқиға бізді алаңдатып отыр. Зардап шеккен дәрігер қазір медициналық көмек алуда. Дәрігерлер күн сайын адамдарға көмек көрсетуге дайын. Бірақ осындай әрекеттер олардың еңбегін бағаламайтынымызды көрсетеді. Біз бұған түбегейлі қарсымыз»,- дейді министр.
Еске салайық, Талғар ауруханасының қабылдау бөлімінде науқастың туыстары хирургты соққыға жыққан еді. Оқиғадан кейін кезекші маман ауруханаға жатқызылды. Дәрігердің миы шайқалған. Қазір оның жағдайы жақсы. Ауруханада ем қабылдап жатыр.
