Атырау облысында мұнай-газ саласында ірі жобалар жүзеге асады

Биыл Атырау өңірінде құны 817 млрд. теңгеден асатын мұнай-газ бағытындағы екі ірі жоба жүзеге асырылады. Бұл туралы халыққа онлайн түрде есеп берген Атырау облысының әкімі айтты. Махамбет Досмұхамбетовтің сөзінше, оның бірі — жылына 1 млрд текше метр газ өңдейтін Қашаған кен орнындағы зауыт. Алпауыт кешеннің құрылысына 2 800 адам тартылады. Ал жоба іске қосылғаннан кейін 600 тұрақты жұмыс орны ашылады. Сондай-ақ өңірде өткір тұрған экологияны оңалту үшін жергілікті билік жаппай көгалдандыру жұмыстарын жүргізбек. Алдағы 4 жылда облыс аумағында 7 миллион көшет отырғызылады.

Махамбет Досмұхамбетов, облыс әкімі:
Біздің бастамамызбен көгалдандыру бойынша үлкен жоба көзделіп отыр. Қала аумағынан жалпы көлемі 5 мың гектардан астам учаскелердің тізбесі жасалды. Оларға тал отырғызу жұмыстарына 20-ға жуық ірі мұнай-газ кәсіпорындарын, соның ішінде, НКОК, «Теңізшевройл» сияқты шетелдік компанияларды тарту көзделуде.