Қаржы министрі бюджет қаржысын игермеген мемлекеттік органдарды атады

Қаржы министрі Ерұлан Жамаубаев бүгін Үкімет отырысында қаңтардағы мемлекеттік бюджеттің атқарылу көрсеткіштерін баяндады.

«Мемлекеттік бюджеттің шығыстары 91 пайызға, республикалық бюджеттің шығыстары – 94,4 пайызға, жергілікті бюджеттердің шығыстары 80,6 пайызға атқарылды. Республикалық бюджет бойынша 1 трлн 212 млрд теңгеге сомасына шығыстар жүргізілді. Орындалмау 72 млрд теңгені құрады, оның ішінде үнемдеу - 7 млрд теңге. Игерілмеу сомасы - 65 млрд теңге. Игерілмеудің неғұрлым ірі сомалары келесі орталық мемлекеттік органдарда қалыптасты: Қаржы, Цифрлық даму, инновациялар және аэроғарыш өнеркәсібі, Төтенше жағдайлар, Білім және ғылым және Мәдениет және спорт министрліктері. Игерілмеудің негізгі себептері: төлем жөніндегі құжаттарды ұзақ келісу, орындалған жұмыстар актілерін уақтылы ұсынбау, нақты көрсетілген қызметтер көлемі, шарттар мен қосымша келісімдерді қазынашылық органдарына тіркеуге кеш ұсыну», - деді министр. 

Бұдан бөлек, жергілікті бюджеттердің шығыстары 203 млрд теңгені құрады. Атқарылмағаны - 49 млрд теңге. Биыл өңірлерге 1,9 трлн теңге сомасында нысаналы трансферттер көзделген. Оларға 1 ақпандағы жағдай бойынша 32 млрд теңге бөлінген. Олардың 79,3 пайызы игерілген. Атқарылмағаны – 6 млрд теңге, оның 2 млрд теңгесі – үнемдеу, 4 млрд теңгесі игерілмеген. 

«Неғұрлым көп игерілмеу Батыс Қазақстан, Жамбыл облыстарында, Нұр-Сұлтан қаласында, Ақмола және Атырау облыстарында қалыптасты», - деді Жамаубаев.