Жалған дипломмен әкім болғысы келген қостанайлық азамат ұсталды

Қостанай облысының Қарасу ауданында жоғары білім туралы дипломды сатып алған 50 жастағы ер адамның қылмыстық әрекеті әшкереленді. Құжатта оның Тұрар Рысқұлов атындағы Қазақ экономикалық университетін 2006 жылы тәмамдағаны жазылған.

Алайда, кейін айыпкердің дипломды 2009 жылы Алматы қаласында белгісіз біреуден 350 АҚШ долларына сатып алғаны анықталды. Құжаттың жалған екенін арнайы зертханалық сараптама да нақтылады.

Мәлім болған айғақтар негізінде ер адамның үстінен қылмыстық іс қозғалды. Ол жалған дипломмен әкімнің қызметіне орналаспақ болған кезінде ұсталған.

Дәуренбек ӘБДІБЕК