«Көкжайлау» тау шаңғысы курорты жобасын қаржыландыру барысында заңбұзушылықтар анықталды

Қаржы министрлігінің Ішкі мемлекеттік аудит комитеті курорт құрылысына жұмсалған барлық қаражатты тексеріп шыққан. Тиісті аудиторлық шаралар қорытындысына сәйкес заңнаманы бұзудың бірнеше фактісі әшкереленді. Қазір материалдар Сыбайлас жемқорлыққа қарсы іс-қимыл агенттігінің Алматы қалалық департаментіне процессуалдық шешім қабылдау үшін жіберілді. Естеріңізге сала кетсек, 2019 жылдың 3 сәуірінде Іле Алатауы ұлттық паркі аумағындағы 5 жер учаскесі жалға беру үшін тендерге қойылғаны белгілі болды. Бұл жобаға қоғам тарапынан наразылық туындап, кейін Мемлекет басшысы Қасым-Жомарт Тоқаев «Көкжайлау» тау шаңғысы курорты жобасымен айналысуға тыйым салған еді.