Қармақшы ауданында егістік алқаптарға су жетпей жатыр

Қызылорда облысы Қармақшы ауданында егістік алқаптарға әлден су жетпей жатыр. Алдашбай ахун ауылының диқандары биыл 160 гектар жерге күріш дақылын өсіруді қолға алған. Ерте көктемнен жерді өңдеп, дәнді сеуіп қойған шаруалар, әлі күнге дейін атыздарды суға толтыра алмай отыр.

Алдашбайлық шаруалар күріштен бөлек, биыл 23 гектарға бақша дақылдарын екті. Мұнда да жағдай мәз емес. Жарманың түбіне қос-қостан су айдайтын қондырғы қойып, егінжайды шама-шарқынша суарып отыр. Ең болмаса, мемлекеттің арзан жанар-жағармайы берілсе, дейді шығынға батқан диқандар.

Ырзық-несібесін жерден тапқан ауыл тұрғындарының әлеуеті егіннің шығымына байланысты. Сондықтан су жеткізу мәселесі шешілмесе, есіл еңбек зая кетпек.

Әділбек СЕРІКҰЛЫ