Жаңалықтарды Telegram арнамыздан оқыңыз!Еуропалық Одақ COVID-19-дан зардап шеккен елдердің экономикасын қолдауға 540 миллиард еуро бөлмек. Мұндай шешімді Одаққа мүше елдердің басшылары онлайн саммитте бекітті. Еуропалық экономиканы құтқаруға бағытталған жедел бағдарлама 1 маусымнан бастап күшіне енеді. Яғни 540 миллиард еуроның 100 миллиарды жұмыс берушілерге қызметкерлерін қысқартудан сақтап қалуға бөлінеді. 200 миллиард еуроға Еуропалық инвестициялық банк шағын және орта кәсіпкерлікті несиелендіреді. Қалған қаржы коронавирустан қатты зардап шеккен Италия мен Испанияны дефолттан аман алып қалуға аударылады. Онан бөлек, Одаққа мүше мемлекеттердің басшылары қарт құрлықтың экономикасын қайта қалпына келтіруге бағытталған қор құруға уағдаласты.
Нұрсұлу ҚАСЫМ
