Жаңалықтарды Telegram арнамыздан оқыңыз!«Әрбіреудің тілін, өнерін білген кісі онымен бірдейлік дағуасына кіреді». Президент Абайдың 25-ші қарасөзінен осындай мысал келтіре отырып, жастардың неғұрлым көп тіл білсе, соғұрлым мүмкіндігі кеңейетінін баса айтты. Демек тіл мәселесі, кеше, бүгін емес, сонау 19-ғасырда да өзектілігін жоймаған.
Өзімізден озық тұрған елдермен деңгейлес болу үшін, сол елдің тілін меңгерген абзал. Абайдың қара сөзіндегі мұндай мазмұнды ойларды Президент бүгінгі тәжірибемен ұштастыра жеткізді. Яғни, тіл білу арқылы, дамыған мемлекеттердің мүмкіндігін пайдамызға жаратамыз. Жастарды білуге, білімді болуға насихаттаған ақынның өзі де кезінде 4 тілді жетік меңгерген.
Биыл ақын шығармалары шет елдің 10 тіліне аударылады. Ал қазақ тілді кітаптары еліміздің әр кітапханасында самсап тұр. Ғалымдарды қынжылтатыны сол, ақын туындылары миллиондаған данамен шықса да, оқырман аз. Сондықтан да Абай еңбектері шетелдіктерден бұрын, әр қазақтың рухани азығына айналу керек.
Абай – еліміздің мәдени капиталы. Әлемдік деңгейде ақынды қаншалықты танытсақ, ұлтымыздың мерейі де соншалықты асқақтай түспек. Ал одан бұрын Абайдың тәрбиесі, тәжірибесі, ой-өнегесі арқылы – қоғамдық сананы жаңғырту керек. Президенттің мақаладағы негізгі тұжырымы осы.
Раушан САЙЛАУҚЫЗЫ
