Балаға дөрекілік танытқан ақтаулық тіс дәрігері жұмыстан шығарылды

Ақтауда науқас балаға дөрекілік көрсеткен дәрігерге қатысты іс қозғалды. Төлеген Мұхамбетов есімді балалар хирургі тісі ауырып келген 7 жастағы бүлдіршінге өрескел қылық көрсетті деп айыпталып отыр. 

Келеңсіз жағдай облыстық стоматологиялық орталықта болды. Дәрігердің айтуынша, ол баланы тісін жұлуға көндіре алмаған. Бүлдіршінді анасының өтінішімен 3-ші рет қайта қабылдап, тәртіпке салмақ болыпты. Бейнежазбада хирургтың баланы жұлқып, дөрекі іс-әрекет көрсеткені анық байқалады. Осы оқиғадан кейін бүлдіршіннің анасы полицияға шағым түсірді. Сондай-ақ, ол баласының сал ауруына шалдыққанын айтқан. 

Стоматология орталығының басшылығы тентек мінезді маманды сол күні жұмыстан шығарды. Ал жасөспірімге қандай дәрежеде дене жарақаты салынғанын анықтау үшін полиция сот-медициналық сараптама тағайындады. 

Қуат Машырықов, Маңғыстау облыстық стоматология орталығының директоры:

Мықты дәрігер, мақтауға тұрарлық. Бірақ оның мына қылмысын біз ақтап қала алмаймыз. Жұмыстан босатылды.

Қалдымұрат Айғарақов, Ақтау қалалық Полиция басқармасы басшысының бірінші орынбасары:

Баланың денесінде жеңіл жарақат болса, ҚР Әкімшілік кодекстің 73/1 бабымен әкімшілік жауапкершілікке тартамыз. Денесінде жарақат болмаған жағдайда Осы кодекстің 73/2 бабы бойынша жауапкершілікке тартамыз.

Аягөз Оралбайқызы