Жаңалықтарды Telegram арнамыздан оқыңыз!Аталмыш шараға облыс әкімінің бірінші орынбасары Д.Сатыбалды мен Қазақстан футбол федерациясының президенті Е.Қожағапанов қатысты.
ҚР футбол федерациясының қолдауымен Шымкент қаласындағы «Биік» спорт кешені жанынан құрылған «Оңтүстік» футболы академиясы 2015 жылдың қыркүйек айынан бастап жұмыс жүргізіп келеді. Академиядағы жас футболшыларға жоғары дәрежелі дайындық жұмыстарын жүргізу мақсатында испаниялық 5 білікті жаттықтырушы шақырылып жұмыс істеуде, деп хабарлайды Оңтүстік Қазақстан облысы әкімдігінің баспасөз қызметі.
Академия Қазақстан Республикасы футбол федерациясы арқылы қаржыландырылуда. Жаттықтырушылар облыстың аудан, қалаларынан келген футболшылар арасынан іріктеу жұмыстарын жүргізіп, 2001, 2002, 2003 жылы туылған жасөспірімдер арасынан 3 топта 66 спортшыны қабылдап, тереңдетілген жаттығу жұмыстарын жүргізуде.
Академияның мақсаты жоғары дәрежелі футболшыларды еліміздің Премьер-Лига командаларына дайындау және шақырылған жаттықтырушылар арқылы жергілікті жаттықтырушылардың тәжірибелік дәрежелерін жоғарылату.
Бүгінгі таңда Оңтүстік Қазақстан облысында 1 облыстық, 31 аудандық, қалалық балалар мен жасөспірімдер спорт мектебінде футбол бөлімдері жұмыс істейді. Онда 279 жаттықтырушы 8876 балаға оқу жаттығу жұмыстарын жүргізеді.
Сонымен қатар, облыста «Ордабасы» кәсіби футбол клубы» акционерлік қоғамы, «Қазығұрт» спорт ойын түрлері клубы және «Қыран» футбол клубы, «Мақтарал» футболы клубы мемлекеттік коммуналдық қазыналық кәсіпорындары жұмыс істейді.
