Жаңалықтарды Telegram арнамыздан оқыңыз!Бүгін, Қызылорда қаласындағы «Қорқыт-Ата» халықаралық әуежайында «Қызылорда-Мәскеу» бағытындағы жаңа тұрақты әуе рейсінің салтанатты ашылу рәсімі өтті.
Шараға Қызылорда облысының әкімі Қырымбек Көшербаев, «Қорқыт-Ата» әуежайы» АҚ директоры Сайлау Жаналин, «Airport Management Group» басқарушы компаниясының бас менеджері Елена Дюгай, «ТРАНСАЭРО» ӘК» ААҚ-ның Қазақстандағы бас өкілі Владимир Кушниренко, сонымен қатар, Сыр өңірінің Құрметті ақсақалдары, Мәслихат депутаттары мен БАҚ өкілдері қатысты.
«Қызылорда өңірінде Қазақстан мен Ресейдің бірлескен 300-ге жуық компаниясы жұмыс істейді. Ресейдің жоғары оқу орындарында 300-ге жуық студент оқиды. Сондықтан, қызылордалықтар үшін аталмыш бағыттағы әуе байланысы өте маңызды. Әуе компаниясы мен жолаушылардың сапарына сәттілік тілейміз!», - деді Қызылорда облысының әкімі Қырымбек Көшербаев.
«Трансаэро» әуе компаниясының ұшақтары аптасына үш рет, сейсенбі, бейсенбі және сенбі күндері қатынайды. Сағат 08:55-те Қызылордадан ұшып шыққан жолаушылар Мәскеу қаласына сағат 09:40-та келіп жетеді. Рейстерге шығатын ұшақтар - «Boeing 767-800» әуе кемелері.
Қызылорда әуежайы 2014 жылдың 24 қазанында халықаралық мәртебеге ие болды. Бүгінде «Қорқыт-Ата» әуежайы бірқатар халықаралық чартерлі рейстермен қатар, тәжік әуе компанияларының транзиттік рейстерін де тұрақты түрде қабылдайды.
2016 жылы әуежай аумағында сағатына 250 жолаушыны өткізу мүмкіндігіне ие жаңа жолаушылар терминалының құрылысы аяқталады.
