Жаңалықтарды Telegram арнамыздан оқыңыз!Түркістан облысының Сарыағаш ауданында бейберекет қоқыс тастайтындар азаймай тұр. Қоршаған ортаны ластайтындарға бұрын тәртіп сақшылары айыппұл салатын. Енді ондай құзірет аудан, ауыл әкімдеріне де берілді.
Сарыағаш қаласының тұрғыны Зина Әлімханова 10 жылдан бері тазалық мекемесінде жұмыс істейді. Таңмен таласа тұрып, көше бойын сыпырады. Тұрғындар тазалық мәдениетін сақтамағандықтан, қоқыс таусылмайтынын айтады.
Зина Әлімханова, тазалық қызметкері:
Таңғы 5-тен келемін, жұмысқа кешке дейін жүреміз. Қоқысты көп тастайды. Қай жерге болсын тастап кететіндер бар. Халыққа өтінішіміз бар, қоқысты әр жерге тастамай, қоқыс жәшігіне тастаса дейміз.
Үлкен жолдың бойында орналасқан елді мекендердің тұрғындары да көлік жүргізушілеріне наразы. Себебі жауапсыз жүргізушілер мен жолаушылардан қалған қоқысты өздері жинауға мәжбүр.
Самат Елесов, Қапланбек ауылының тұрғыны:
Біз қазір Қапланбек ауылының үлкен тас жолының бойында тазалық жұмысын жүргізіп жатырмыз. Үнемі тазалап отырмыз. Себебі жүргізушілер ішкен суының құтысын, қағаз, салфетка, басқасының бәрін тастап кете береді.
Қазір Сарыағаш ауданында 60-тан астам шипайжай, тойхана мен базарлар жұмыс істейді. Аудан атқамінерлері осының бәрін таза ұстап тұру үшін аптасына екі рет тазалық шараларын ұйымдастырады. Айналасын таза ұстамаған мекемелер мен жекелеген азаматтарға айыппұлдар салына бастаған.
Мұрат Байғабылов, Сарыағаш ауданы әкімінің орынбасары:
Алдын полиция қызметкерлері айыппұл салатын болса, қазір Сарыағаш ауданының әрбір ауылдық округіне де сондай құзырет берілген. Яғни тастаған қоқысқа, бейберекет үйдің ауласын, қасбеттерін бұзып тұрған баптарға сәйкес біз айыппұлдар саламыз.
Аудан көлемінде соңғы бір айда қоршаған ортаны ластап, қоғамдық орында қоқыс тастаған 180 адамға 500 мың теңгеге жуық айыппұл салынды. Мұның барлығы халықтың экологиялық мәдениетін көтеру үшін жасалып отыр, - дейді жергілікті билік өкілдері. Себебі тазалық – табандылық пен жауапкершілікті талап етеді. Ал онсыз еткен еңбек еш кетуі мүмкін.
Айнұр Әбілқасымқызы
