Жаңалықтарды Telegram арнамыздан оқыңыз!Былтырғы жылмен салыстырғанда биыл студент саны 30 мыңға көп. Сондықтан жатақхана тапшылығы әлі өзекті. Биыл 6 мыңнан аса студент хостел мен қонақ үйлерді жағалайды. Орын жетіспеушілігі әсіресе Алматы қаласында басым. Ведомство өкілдерінің хабарлауынша, университет жатақханаларының айлық ақысы 20 мың теңгеден басталып, 30 мың теңгеге дейін барады. Ал жекеменшік жатақханалар әр студент үшін мемлекеттен ақша алатын болғандықтан, құнын 40 мың теңгеден асырмауы тиіс.
Ақерке Абылайхан, ҚР ҒЖБМ Жоғары және жоғары оқу орнынан кейінгі білім комитеті төрағасының міндетін атқарушы:
Жатақхана мәселесін де жасырмаймыз, ескі жатақханалар бар. Жекеменшік-мемлекеттік жатақханалардағы жағдай өте жақсы.Сол проблеманы шешеміз деп 2019 жылдан бастап мемлекет тарапынан жұмыстар жүргізіліп жатыр ғой. Қонақ үйлер мен хостелдарға келетін болсақ, ол жерде мемлекеттік-әріптестік тұрғысынан жұмыс жасамаймыз ғой, ол жерде тұру құны – 40,45,60 мыңға дейін баратын бөлмелер бар.
Студенттердің шәкіртақысы өсті
Айта кетейік, жаңа оқу жылында студенттердің шәкіртақысы өсті. Бакалавр степендиясы – 52 372 теңгеге, педагогикалық мамандықтар үшін – 84 мың теңгеге жетті. Ал магистранттар 117 098 теңге, докторанттар – 262 500 теңге алады. Сондай-ақ, Ғылым және жоғары білім вице-министрі биылғы оқу жылына бөлінген 77 мыңнан астам гранттың 99 пайызы игерілгенін айтты.
Гүлзат Көбенова, Ғылым және жоғары білім вице-министрі:
Биыл ұлттық бірыңғай тестілеуге 210 мыңнан астам талапкер қатысты. Оның ішінде 160,5 мың адам немесе 76,35% жоғары білім алуға қажетті шекті балды жинады. 2025 жылы мемлекеттік білім гранттарының конкурсына 113 мыңға жуық өтінім берілді, бұл өткен жылмен салыстырғанда 9 мыңға артық.
Ақниет Балтанова
