Жаңалықтарды Telegram арнамыздан оқыңыз!Қазақстанда британиялық Белфаст Корольдік университетінің ғимараты ашылып, ғылыми-зерттеу бағытында ынтымақтастық орнатылады. Лондонда іскерлік әріптестік меморандумына қол қойылды.
Енді 180 жылдық тарихы бар озық оқу орнында инженерлік-физикалық, медициналық және гуманитарлық мамандықтар бойынша білім алу үшін алысқа ат арылтудың қажеті жоқ. Отандастарымыздың Алматыда оқуына мүмкіндігі болады. Белфаст Нархоз университетімен келісімге қол қойды. Сондай-ақ Сәтбаев атындағы қазақ ұлттық техникалық зерттеу университеті Англиядағы Эксетер, Шотландиядағы Глазго жоғарғы оқу орнымен өзара түсіністік туралы меморандум жасасты.
Мейрам Бегентаев, Сәтбаев атындағы қазақ ұлттық техникалық зерттеу университетінің ректоры:
Тек бакалавриат студенттерін ғана емес, магистранттар мен докторанттарды да оқытуға бел буып отырмыз. Білім беру ғана емес, ғылым бағыты бойынша да жұмыс істейміз.
Мойра Боланд, Глазго университетінің орталық және оңтүстік Азиядағы жаһандық өзара іс-қимыл жөніндегі деканы:
Қазақстанның үздік университеттерінің бірімен бірлесе отырып, мамандар даярлауға асықпыз. Студенттердің екі ел арасында қатынап, білім нәрімен сусындайтынына сеніміміз мол.
