Жаңалықтарды Telegram арнамыздан оқыңыз!«Yandex Qazaqstan» Әл-Фараби атындағы Қазақ Ұлттық университетінің студенттеріне кезекті воркшоп өткізді. «Нейрожелілер бізді жаңа нәрсеге қалай үйретеді?» атты семинарға жасанды интеллект пен машина саласын дамытуға ұмтылған білім алушылар қатысты. Университет басшылығы осы бағытта бірлесе жұмыс істеуге, ынтымақтастықты жалғастыруға қызығушылық танытты.
«Яндекс Іздеудің» халықаралық дамыту жөніндегі директоры нейрондық желілерді пайдаланудың қыр-сырымен бөлісті. Оқу тапсырмаларын қалай тиімді орындауға болатынын, қосымша материалдарды пайдаланудың жолдарын көрсетті.
Александр Поповский, «Яндекс іздеу» компаниясының халықаралық дамыту жөніндегі директоры:
Студенттердің деңгейі мені таң қалдырды. Бұл Қазақстанның жаңа технология саласындағы жетістігін көрсетеді. Ілгерілеу, алға жылжу тоқтамайды. Қазір кей мамандыққа сұраныс жоғалса, заман талабына сай жаңасы пайда болып жатыр. Бұрын ақпаратты іздеуге бірнеше күн жоғалтсаңыз, қазір жасанды интеллектің көмегімен бір мезетте қол жеткізесіз.
Ал «Яндекс іздеудің» халықаралық өнім жөніндегі директоры студенттерге іздеу жүйесінің даму сатыларын көрсетті. Яғни, сілтемелер тізімінен бастап өзіңе қажет ақпаратты іздеудің заманауи мүмкіндіктерімен таныстырды.
Виктор Сикора, «Яндекс іздеу» компаниясының халықаралық өнім жөніндегі директоры:
Бұрын «Яндекс іздеу» жүйесінен қазақша сұраныс жіберетіндердің үлесі 7% болатын. Қалғандары басқа тілде. Соңғы жылдары қазақша контентке инвестиция салудың арқасында бұл көрсеткіш 20%-ға жетті. Бұл – тез жауап алу тетіктерін, нейро технологияларды іске қосу және сапалы аударма жасау жұмыстарының нәтижесі.
Еркін Дүйсенов, Әл-Фараби атындағы ҚАЗҰУ басқарма төрағасының орынбасары:
Бүгін «Яндекс» сияқты танымал компания біздің университімізге арнайы келіп, студенттерге дәріс өткізіп, өз тәжірибесімен бөлісті. Әл-Фараби атындағы Қазақ Ұлттық университетінің мамандары мен ғалымдары осы бағытта ынтымақтастықты арттыруға басымдық береді.
Шара аясында компания өкілдері білім ордасының басшылығымен кездесті. Yandex Qazaqstan өкілдері студенттерге арналған семинар, дәріс оқу, тәжірибе алмасу бірлескен бастамалардың басы екенін атап өтіп, университет басшылығына алғыс білдірді.
Қуан Нұрақын
